(alang sa Palanca Awardee, Cora Almerino)
Buot kong mahubog ning imong pag-abot
Aron taralon ngadto sa bisan asang suok sa panahon
Kay tatak kini sa nangaging mga adlaw ug gabii
Diin atong giinom, gidug-ab ug gisuka ang liboan
Ka mga letra nga nagdibuhog mga metapora
Ibabaw sa nag-umog nga lapad natong lamesa.
Sa atong pag-alima ug pagpasagad sa atong mga damgo
Gipangga nato ang Adlaw, dag-om, bituon ug kalangitan
Nga nanamin sa atong pagpangyam-id, panaway ug bugal-bugal
Sa atong gipuy-an nga kalibotan nga nagmugna nato.
Buot lagi ko nga mahubog aron akong iyawyaw nimo
Ang ngalan nga Myke, Adonis, Januar, John B. Ulysses, Noel R,
Jeremiah, Josua, Gerard, Delora, Eyon (PSK), Tem (PSK), Fred C (PSK)
Lam, ug uban kanila nangahas ta
Pag-ugay-ugay sa kahayag sa mga bituon sa langit
Nga kadaghan nato matungab sa atong mga katawag bahakhak.
Bitaw, gusto kong mahubog uban kanimo aron mabatyag nako pag-usab
Ang imong kusog, kalig-on, kahalangdon ug kamatinud-anon.
Nga wan a nako mahikap, mahangop, mahingos sa dugayng panahon.
Matahom ang imong mga balak Cora, kanila buot kong mahubog.
ERNESTO LARIOSA
San Fernando, Sugbo
0 komentaryo:
Post a Comment